Beynəlxalq Şahmat Federasiyası (FIDE) mart ayı üçün şahmatçıların dünya reytinq siyahısını açıqlayıb.
90plus.az xəbər verir ki, Azərbaycan şahmatçıları arasında ən yüksək göstəriciyə Şəhriyar Məmmədyarov sahibdir.
Qrossmeysterimiz 2748 xalla 11-ci yerə yüksələrək doqquz pillə irəliləyib. Teymur Rəcəbov (2692) üç pillə geriləyərək 35-ci mövqeyə düşüb. Rauf Məmmədov (2657) isə dörd pillə irəliləyərək 67-ci sıraya yüksəlib.
Ümumi reytinq cədvəlinə 2833 xalla norveçli Maqnus Karlsen liderlik edir.
Qadınlar arasında ən yaxşı Azərbaycan şahmatçısı dəyişib. İki pillə geriləyən Gövhər Beydullayeva (2400) 43-cü sırada qərarlaşsa da, ölkənin birincisi olub.
Bu dəyişiklik Günay Məmmədzadənin 15 pilləlik geriləməsi ilə bağlıdır. O, hazırda 2396 xalla 51-ci pillədədir. Ülviyyə Fətəliyeva (2387) yeddi addım irəliləyərək 57-ci mövqeyə, Xanım Balacayeva (2358) isə dörd pillə qalxaraq 85-ci yerə yüksəlib.
Qadın şahmatçılar arasında reytinq siyahısına 2633 xalla çinli Yufan Hu liderlik edir.
