Rafael Fiziyev Bakıda qalib oldu: “Bu xalq qalib gəlməyə layiqdir”.
90plus.az xəbər verir ki, Bakıda keçirilən “UFC Fight Night” turnirində Azərbaycanlı döyüşçü Rafael Fiziyev möhtəşəm qələbə ilə yadda qalıb. Yüngül çəki dərəcəsində çıxış edən Fiziyev Çili təmsilçisi İqnasio Bahamondesə qarşı döyüşdə üstünlük nümayiş etdirərək, hakimlərin yekdil qərarı ilə qalib elan olunub.
Qələbədən sonra Azərbaycan bayrağını dalğalandıran Fiziyev emosional çıxışı ilə azarkeşləri duyğulandırıb:
“Bu millətə bağlıyam. Onlar qalib gəldilər. Yaşasın Azərbaycan! Bu azarkeşlərin qarşısında uduza bilməzdim. Bu xalq daha xoşbəxt olmağa və yaşamağa layiqdir”, – deyə o, döyüş sonrası açıqlamasında bildirib.
Turnirin əsas döyüşündə ABŞ təmsilçiləri Camal Hill və Halil Rountri oktagona çıxacaqlar.
Qeyd: bu UFC gecəsində daha iki azərbaycanlı döyüşçü rinqə çıxıb.
Nazim Sadıxov braziliyalı Nikolas Mottanı nokautla məğlub edərək, turnirdə ilk nokautla qələbəni qazanan Azərbaycan döyüşçüsü olub.
Digər təmsilçimiz Tofiq Musayev isə Qırğızıstanlı Mıktıbek Orolbai ilə qarşılaşmada ilk raundda məğlubiyyətlə üzləşib.
Bakıda keçirilən UFC turniri yerli azarkeşlər üçün xüsusi əhəmiyyət daşıyır və Azərbaycanlı döyüşçülərin bu gecədəki çıxışları böyük maraqla izlənir.
