Rumıniyanın paytaxtı Buxarestdə keçirilən Avropa çempionatında 3 sərbəst güləşçimiz medal qazanıb. 90plus.az xəbər verir ki, Maqomedxan Maqomedov (97 kq) gümüş, İslam Bazarqanovla (57) və Əli Rəhimzadə (65 kq) bürünc mükafata yiyələniblər. Avropa çempionu M.Maqomedov finalda Gürcüstan təmsilçisi Givi Matçaraşviliyə məğlub olub. 3-cü yer uğrunda görüşlərdə isə İslam Bazarqanov ukraynalı Kamil Kərimova, Əli Rəhimzadə Fransa idmançısı Həmzət Arsamerzuyevə qalib gəlib. Qeyd : Azərbaycan millisi indiyə qədər Avropa çempionatında 9 medal qazanıb. Yunan-Roma güləşçilərdən Nihat Məmmədli (60 kq), Murad Məmmədov (63 kq), Həsrət Cəfərov (67 kq) birinci, Rəşad Məmmədov (55 kq), Ülvü Qənizadə (72 kq) ikinci, Beka Kandelaki (130 kq) üçüncü yeri tutub. Qadın güləşçilərdən isə Mariya Stadnik (50 kq) və Alyona Kolesnik (59 kq) qitə çempionu olublar, Elis Manolova (65 kq) bürünc mükafata yiyələnib.