FİFA-da İnfantino ilə bağlı narazılıqlar – Donald Trampa dəstək müzakirə yaradır.
90plus.az xəbər verir ki, FİFA prezidenti Canni İnfantinonun siyasi mövqeyi təşkilat daxilində gərginlik yaradıb.
FİFA prezidenti Canni İnfantinonun ABŞ-ın keçmiş prezidenti Donald Trampa açıq dəstəyi qurum daxilində narazılıqlara səbəb olub.
Jurnalist Romain Molina-nın məlumatına görə, İnfantinonun Trampı açıq şəkildə dəstəkləməsi, ona FİFA tərəfindən təsis edilən “FİFA Sülh Mükafatı”nın verilməsi və müxtəlif yüksək səviyyəli tədbirlərdə birgə görünməsi bəzi federasiyalar və rəhbər şəxslər tərəfindən tənqid olunur.
Məlumata əsasən, bir sıra funksionerlər bu addımların FİFA-nın siyasi neytrallıq prinsipinə zidd olduğunu düşünürlər.
Eyni zamanda iddia olunur ki, 2026-cı il Dünya Çempionatı ilə bağlı vergi güzəştlərinin tam əldə olunmaması (yalnız 18 federasiyaya qismən güzəşt verildiyi bildirilir) da təşkilat daxilində əlavə narazılıq yaradıb.
Hazırda FİFA tərəfindən bu iddialara dair rəsmi açıqlama verilməyib. Məsələ ilə bağlı müzakirələrin davam etdiyi bildirilir.
