Konfrans Liqasının ilk pley-off oyununda öz evində təmsilçimiz "Zirə" ilə qarşılaşacaq Kipr klubu "Omoniya"nın baş məşqçisi Valdas Dambrauskas oyunöncəsi fikirlərini deyib.

90plus.az xəbər verir ki, litvalı mütəxəssis "Zirə" haqqında belə deyib: 

"Rəqibdə çox yaxşı komanda ruhu görürəm. Onlar ilk oyunlarını Avroliqada "Şerif"ə qarşı keçirdilər. Çox yaxşı matç idi. "Şerif" penaltilər seriyası ilə mərhələ adladı. Daha sonra "Zirə" Konfrans Liqasında Slovakiya komandasını məğlub etdi. Bu da komandaya güc verdi. Düşünürəm ki, Xorvatiya "Osiyek"i ilə oyunlarda çox dəyişdilər. Xüsusilə Azərbaycanda keçirilən cavab matçında "Zirə" üstün idi".

"Zirə"nin oyun tərzi: "Xüsusilə müdafiədə yaxşı oynayırlar. Biz rəqib haqqında məlumat toplamışıq.  Onların ötən mövsüm Azərbaycan çempionatındakı bir neçə oyununa da nəzər saldıq. Bu komandaya qol vurmaq çox çətindir. Hücumçular da hər oyunda çox çalışırlar. Müdafiə xətləri fərqlənir. Çünki bu, tipik üslub deyil. Komandanın müdafiəyə oturduğu və baş məşqçinin tapşırıqları əsasında oynadığı görünür".

Dambrauskas oyunun çətinliyi barədə: "Matç boyu diqqətli olmalıyıq. Müsbət nəticə əldə edəcəyimizə inanıram. Azarkeşlərimiz kimi, biz də bu qarşılaşmanı səbirsizliklə gözləyirik. Ümid edirik ki, onları sevindirəcəyik. Bu görüşün çətin keçəcəyini düşünürəm. Çünki açar ötürmələr xətlərdə boşluq verən komandalara qarşı keçir. Maneələrlə qarşılaşacağıq. Amma inanıram ki, futbolçular sabah yaxşı iş görəcəklər. Biz hər gün videoanalizlər etdik. Rəqibin oyun tərzinə uyğun məşqlərimiz oldu. Oyuna hazırıq. Evdə oynayırıq və cəsarətli olmalıyıq. Meydanda baş verən heç bir şey bizim inamımızı öldürə bilməz". 

Qeyd: "Omonia - Zirə" oyunu 22 avqust - sabah saat 21:00-da başlayacaq. Cavab matçı bir həftə sonra Bakıda baş tutacaq.