"Zirə"nin qapıçısı "Osiyek"lə matçdan sonra jurnalistlərin suallarını cavablandırıb.
90plus.az xəbər verir ki, UEFA Konfrans Liqasının 3-cü təsnifat mərhələsinin “Osiyek”lə cavab oyununda penaltilər seriyasında 5 zərbədən 4-nü dəf edərək matçın qəhrəmanına çevrilən “Zirə”nin qapıçısı Tiaqo Silva bunları deyib:
"Özümüzlə qürur duymalıyıq. Yaxşı çempionatı təmsil edən güclü kollektivə qarşı layiqli mübarizə aparıb qələbə qazandıq. Nəticədən məmnunuq, xoşbəxtik. Artıq bundan sonra “Omoniya” (Kipr) ilə oyunlara köklənməliyik. Baş məşqçimiz Rəşad Sadıqov penaltilər seriyasından öncə mənə yaxınlaşdı və bildirdi ki, “Şerif”lə oyunsonrası penaltilər seriyasındakı çıxışımdan məmnun qalmayıb. Baş məşqçimiz hər zaman doğrularımızı, səhvlərimizi bilir. Mən onun iradlarını pozitiv qəbul edirəm. Bəlkə də elə buna görədir ki, bu dəfə penaltilər seriyasındakı çıxışım çox uğurlu alındı". ”Şerif”lə oyundakı penaltilər seriyası “Osiyek”lə matçdakından fərqli idi. Orda demək olar ki, əksər zərbələr qola çevrilmişdi. Hər oyun bir təcrübədir. Səhvlərimizdən öyrənirik. Rəqib qapıçı da 3 penalti dəf etdi. Normalda sən rəqibin 3 zərbəsini qaytarmısansa, qalib olursan. “Osiyek”in qapıçısı qola imkan vermədikcə, mən daha da gərgin olurdum. Düşünürəm ki, eynilə mən də penaltini dəf etdikcə rəqibdə gərginlik yaranırdı. Çox şükür ki, sonda biz daha dəqiq olduq və qələbə qazandıq. Futbol kollektiv oyundur. Biz rəqibin penaltiləri necə yerinə yetirdiyini analiz etmişdik. Demək olar ki, rəqibin ilk 3 penaltini hansı istiqamətə vuracağını analizlərə əsasən bilirdim. Lakin son 2 penaltini intuisiyama əsasən qaytardım. Buna görə də qapıçı yoldaşlarıma və qapıçı məşqçimizə minnətdaram. ”Omoniya” güclü rəqibdir. Kipr çempionatı kifayət qədər yaxşı yarışdır. Lakin bizim rəqibdən asılı olmayaraq çəkinəcəyimiz bir şey yoxdur. Sona qədər mübarizə aparacağıq. Əlimizdən gələni edəcəyik ki, istədiyimizə nail olaq".
