“Seltik” dramatik çempionluq qazandı – “Harts”ın 66 illik arzusu son dəqiqələrdə puç oldu.

90plus.az xəbər verir ki, Şotlandiya Premyer Liqasının son turu futbol tarixinin ən dramatik çempionluq yarışlarından biri ilə yadda qalıb. “Seltik” doğma meydanda “Harts”ı 3:1 hesabı ilə məğlub edərək ardıcıl beşinci dəfə ölkə çempionu olub.

Edinburq təmsilçisi isə tarix yazmağa çox yaxın idi. “Harts”a 66 ildən sonra ilk dəfə çempion olmaq üçün cəmi 1 xal kifayət edirdi. Matçın 86-cı dəqiqəsinə qədər hesab onları qane etsə də, son dəqiqələrdə yaşananlar bütün arzuları darmadağın etdi.

Mövsüm boyu nümayiş etdirdiyi xarakter son dəqiqələrdə yenə öz sözünü dedi. “Seltik” əvvəlcə hesabı bərabərləşdirdi, daha sonra isə təzyiqi artıraraq önə keçdi.

Ən qalmaqallı an isə əlavə vaxtda yaşandı. “Harts”ın qapıçısı Aleksander Şvolov son hücum üçün irəli çıxarkən top itirildi və Kallum Osmand boş qapıya doğru sərbəst qaçaraq üçüncü qolu vurdu.

Bu qoldan dərhal sonra yüzlərlə “Seltik” azarkeşi meydana axışdı. Azarkeşlər təkcə çempionluğu qeyd etmədi, eyni zamanda məyus vəziyyətdə olan “Harts” futbolçularına yaxınlaşaraq onları təxribata çəkməyə çalışdı. Hadisələrdən sonra “Harts” futbolçuları oyunun tamamlanmasını gözləmədən tunelə yollandılar və bir daha meydana qayıtmadılar.

Şotlandiya futbol ictimaiyyətində baş verənlər ciddi narazılıq yaradıb. Liqa rəhbərliyinin nümayəndələrinin stadionda olduğu bir vaxtda təhlükəsizlik problemləri və azarkeş davranışı geniş müzakirə olunur. Yerli mediaya görə, “Seltik” ciddi cəzalarla üzləşə bilər.

Baş məşqçi Martin O’Neill rəhbərliyində “Seltik” mövsümün son bölümündə ardıcıl yeddi qələbə qazanaraq çempionluğa uzanıb. Komanda gələn həftə ölkə kubokunu da qazanacağı halda daxili “dubl” rəsmiləşdirəcək.

“Harts” üçün isə bu məğlubiyyət böyük zərbə olsa da, klubun mövsüm ərzində nümayiş etdirdiyi performans Şotlandiya futbolunda uzun illər xatırlanacaq.