Bu gün UEFA Konfrans Liqasının III təsnifat mərhələsində “Sabah” doğma meydanda Bolqarıstanın “Levski” klubuna 0:2 hesabı ilə məğlub olaraq turnirdə mübarizəni dayandırıb.

90plus.az xəbər verir ki, oyundan sonra keçirilən mətbuat konfransında “Sabah”ın baş məşqçisi Valdas Dambrauskas jurnalistlərin suallarını cavablandırıb.

“Levski”ni təbrik edirəm. Əgər iki oyunda qol vurmursansa, deməli, rəqib növbəti mərhələyə daha çox layiqdir,” – deyə litvalı mütəxəssis bildirib.

Dambrauskas azarkeşlərə də təşəkkürünü bildirib:
“Stadionda əla atmosfer var idi. Təəssüf ki, onları sevindirə bilmədik. İndi bu hissləri unudub, diqqətimizi çempionata yönəltməliyik.”

“Qorxaq oyun” tənqidinə cavab

Jurnalistlərin “Bu gün daha qorxaq “Sabah” gördük” fikrinə Dambrauskas belə cavab verib:
“Bu, oyunçularımıza hörmətsizlikdir. Əksinə, biz risk etdik. Rəqib risk etmirdi. Oyunun birinci hissəsində bir səhvimiz qolla nəticələndi. Daha sonra hücumları artırmağa çalışdıq, amma son ötürmələr çatışmadı.”

Əvəzetmələr və nəticə

Baş məşqçi Cessi Sekidika və Pavol Şafrankonun əvəzinə oyuna daxil olan futbolçuların hücumda effekt verməməsinə də toxundu:
“Hər dəyişikliyin arxasında niyyətimiz oyunu gücləndirməkdir. Əgər qol vursaydılar, bizə təqdir ediləcəkdi. Təəssüf ki, bu gün bu dəyişikliklər işə yaramadı.”

Transfer siyasəti və avrokubok hədəfi

Komandanın vaxtında transfer etməməsi ilə bağlı sualı Dambrauskas belə cavablandırıb:
“Rəqib bizdən daha dəyərli heyətə malik idi. Amma bu məğlubiyyətin səbəbi kadr çatışmazlığı deyil. Mən oyunçularımı dəyişməklə problemi həll edən məşqçi deyiləm. Daha çox işləməli və daha ağıllı yollar tapmalıyıq ki, gələn mövsüm avrokuboklarda daha uğurlu çıxış edək.”

Liqada məqsəd: hər oyunda qələbə

Dambrauskas ölkə çempionatındakı hədəfləri də açıqlayıb:
“Məqsədimiz sadədir – hər oyunda qalib gəlməyə çalışmaq. Biz ən yaxşı nəticəni qazanmaq üçün maksimum gücümüzü ortaya qoyacağıq.”