Voleybol üzrə kişilərdən ibarət Azərbaycan millisinin yeni baş məşqçisi Fərid Cəlalov təyin olunub. 90plus.az Azərbaycan Voleybol Federasiyasının (AVF) media xidmətinə istinadən xəbər verir ki, onun təyinatı AVF-nin İdarəyə Heyətinin geniş iclasında açıqlanıb. Tədbirdə AVF-nin prezidenti Şahin Bağırov, vitse-prezidentlər Faiq Qarayev və Bəhruz Quliyev, baş katib Faiq Orucov, İdarə Heyətinin üzvləri, klub rəhbərləri, məşqçilər, həkimlər, hakimlər və federasiyanın digər əməkdaşları iştirak ediblər. Ş.Bağırov iclası açaraq qonaqları salamlayıb, müzakirəyə çıxarılacaq məsələlər haqqında məlumat verib. Daha sonra F.Cəlalov yığmamızın may-iyun aylarında keçiriləcək Qızıl Avropa Liqasına hazırlıq planını təqdim edib. Həmçinin yeniyetmə və gənc oğlanlardan ibarət yığma komandalarımıza yeni rəhbər təyin olunmuş Cahangir Seyed Abbasi təqdim olunub. İranlı mütəxəssis gənclərin seçimi və yarışlara hazırlıqla bağlı proqramı təqdim edib. İclasda F.Qarayev və B.Quliyev çıxış edərək, yeni təyinatlar və müzakirə olunan məsələlərlə bağlı fikirlərini bölüşüblər.