Azərbaycan əsilli keçmiş futbolçu Əli Daeinin İranı tərk etməsinə icazə verilib. 90plus.az xəbər verir ki, 54 yaşlı mütəxəssisin səyahət qadağası aradan qaldırılıb. Fransanın paytaxtı Parisə yollanan Əli Daei instaqram səhifəsi vasitəsilə FIFA prezidenti Canni İnfantino ilə birgə şəklini paylaşıb. İran millisinin ən məhsuldar futbolçusu kimi tarixə düşən keçmiş hücumçu isveçrəli funksionerin dəvəti ilə bu gün Parisdə keçiriləcək "The Best" mükafatlandırma mərasiminə qatılacaq. Qeyd edək ki, ölkədəki etirazlara dəstək verdiyi üçün İran təhlükəsizlik xidmətləri 2022-ci ilin oktyabrında Əli Daenin pasportunu müsadirə edib.
