Sərbəst güləş üzrə Azərbaycan millisinin üzvü Əliabbas Rzazadə (57 kq) Bakıda Olimpiya təsnifat turnirində Paris-2024-ə vəsiqə qazanması barədə danışıb. 90plus.az xəbər verir ki, Əliabbas olimpiadaya qızıl medal qazanmaq üçün gedəcəyini deyib: “Həm televiziya qarşısından, həm də tribunadan məni dəstəkləyən azarkeşlərə təşəkkürümü bildirirəm. “Doğma divarlar” arasında güləşmək insana xüsusi motivasiya verir. Bu gün ilk lisenziyanı mən qazandım. İnanıram ki, ayağım komandaya düşərli olacaq”. Avropa çempionu yarımfinalda məğlub etdiyi Şimali Makedoniya təmsilçisi Vladimir Yeqorovdan revanşı aldığını söyləyib: “ Yarımfinalda məğlub etdiyim idmançı məni Avropa çempionatında məğlub etmişdi. Bu görüş revanş xarakteri daşıyırdı. Azarkeşlərin də köməyi ilə bu dəfə qələbə qazanmağı bacardım”. Ə.Rzazadə Parisdə keçiriləcək olimpiadaya fəxri kürsünün ən yüksək pilləsinə qalxmaq üçün gedəcəyini vurğulayıb: “ Qarşıda məni daha çətin sınaq gözləyir. Bu cür davam etsəm, qələbələrimi olimpiadada da davam etdirəcəyimə inanıram. Təbii ki, olimpiadaya yollanan güləşçilərin heç biri zəif olmur. Mən də onlardan geri qalmıram. Orada əsas rəqibim Rusiya təmsilçisi olacaq. Onu məğlub edərək, titul qazanmağa çalışacağam. İnanıram ki, bu il mənə düşərli olacaq. Əvvəlki güləşlərimlə müqayisədə çox inkişaf etmişəm”.