“Fənərbağça” İdarə Heyətində gərginlik: Ali Koç və Aziz Yıldırım arasında açıq münaqişə yaşanıb.
90plus.az xəbər verir ki, “Fənərbağça” klubunun prezidenti Ali Koçun rəhbərliyi ilə keçirilən İdarə Heyəti toplantısında ciddi gərginlik yaşanıb. Toplantı zamanı klubun sabiq prezidenti Aziz Yıldırımın sərt çıxışları və qarşılıqlı ittihamlar müzakirələrin əsas mövzusuna çevrilib.
Toplantıda çıxış edən Aziz Yıldırım emosional və qəzəbli tonda hazırkı rəhbərliyi tənqid edib:
“Daxilim doludur, həm də çox. Heç alqışlamayın, hər şeyi açıq şəkildə danışacağam. Ali Koç mənə deyir ki, “Qalatasaray”a heç nə deməmisən. Halbuki mən onların prezidentinə “dəyəri olmayan” dedim. Daha bundan artıq nə deyə bilərdim? Heç bir cavab verə bilmədilər!”
O, həmçinin klubun maliyyə durumu ilə bağlı yayılan bəzi fikirlərə də sərt cavab verib:
“Aziz Yıldırım 612 milyon avro borc qoyub getdi” deyən şərəfsizdir! Əgər doğrudan da mən etmişəmsə, o zaman şərəfsiz mənəm! Hazırda burada oturursunuz. Bura kim tərəfindən tikilib?”
Məkanın klub tərəfindən tikildiyini deyən üzvlərdən birinə isə Yıldırım sərt reaksiya verib:
“Nə klub?! Buranı mən tikmişəm, mən! Pulunu mən verdim, mən tikdirdim! “Fənərbağça” olaraq 10 il geridəyik”.
Toplantı zamanı Ali Koç ilə Aziz Yıldırım arasında maliyyə məsələlərinə dair açıq mübahisə də yaşanıb:
Aziz Yıldırım: ““Fənərbağça”nın nə qədər borcu var, açıqla!”
Ali Koç: “Adamlarını göndər, gəlib baxsınlar.”
Aziz Yıldırım: “25 milyard borc var, borc! Oyunçu ala bilmirsiniz.”
Aziz Yıldırım daha sonra Ali Koçun rəhbərliyində olan Hamdi Akını da hədəfə alıb:
“Otur yerində, lan! Əsəbiləşdirmə məni. Sən 3 iyulda “Fənərbağça” üçün “Ankaragücü” ilə “Trabzonspor” adına bazarlıq etdin. Sənin danışmağa haqqın yoxdur. Sus! Səni çox pis edərəm!”
VİDEO: https://t.me/doxsanplus/105530
“Fənərbağça”nın prezidenti Ali Koç ilə bir klub üzvü arasında da münaqişə yaşanıb.
VİDEO: https://t.me/doxsanplus/105526
Yaşanan bu olaylar “Fənərbağça”da daxili böhranın daha da dərinləşdiyini göstərir. Toplantıdan sonra hər hansı rəsmi açıqlama verilməsə də, baş verənlərin klub daxilində sarsıntı yaratdığı açıq-aşkar hiss olunur.
