Misli Premyer Liqasının 32-ci turunda “Karvan-Yevlax” öz meydanında “Qəbələ”yə 1:2 hesabı ilə məğlub olub.

Oyundan sonra təşkil edilən mətbuat konfransında Yevlax təmsilçisinin baş məşqçisi Füzuli Məmmədov komandasının Premyer Liqanı tərk etməsinin futbolçulara psixoloji təsir göstərdiyini etiraf edib.

90plus.az xəbər verir ki, mütəxəssis buna baxmayaraq komandanın sona qədər mübarizə apardığını bildirib:

“Artıq Premyer Liqada qala bilməyəcəyimiz dəqiqləşmişdi və bu vəziyyətdə futbolçuları oyuna hazırlamaq asan deyildi. Amma uşaqlar əlindən gələni etdilər. Meydanda sona qədər döyüşdülər. Evdə azarkeşlərimizi sevindirmək istəyirdik. Hesabı da açdıq, lakin xırda səhvlər oyunun taleyinə təsir etdi. Belə matçlarda hər detal həlledici olur”.

Baş məşqçi ilk hissədə komandasının hücumda istədiyi oyunu göstərə bilmədiyini vurğulayıb. Onun sözlərinə görə, fasilədə edilən dəyişikliklərdən sonra “Karvan-Yevlax” daha təhlükəli görünməyə başlayıb:

“İlk yarıda hücumlarımız effektli alınmırdı. Rəqib müdafiədə çox rahat oynayırdı. İkinci hissədə müəyyən dəyişikliklər etdik və bundan sonra irəli xətdə daha fəal çıxış etdik. Qol da vurduq. Təəssüf ki, üstünlüyü uzun müddət qoruya bilmədik”.

Füzuli Məmmədov gələcəyi ilə bağlı məsələyə də toxunub. O bildirib ki, hazırda əsas diqqət çempionatın son oyununa yönəlib:

“Mənim müqaviləm mayın sonuna qədərdir. Mövsüm bitəndən sonra rəhbərliklə oturub danışacağıq. Əgər klubun məqsədi yenidən Premyer Liqaya yüksəlmək olacaqsa, burada qalmaq mümkündür. Əks halda digər variantları nəzərdən keçirməli olacağam”.

Baş məşqçi başqa klublardan təklif alıb-almaması barədə danışmaq istəməyib:

“Hazırda bununla bağlı nəsə demək düzgün olmaz. Mənim klubla müqaviləm davam edir və bütün fikrim komandadadır. Mövsüm başa çatdıqdan sonra vəziyyətə aydınlıq gələcək”.

Təcrübəli mütəxəssis növbəti mövsüm üçün planlamada gecikmə olmadığını da qeyd edib:

“Hələ qarşıda bir oyunumuz var. Hamı sona qədər peşəkar davranmalıdır. Futbolçuların müqavilələri davam edir və hər kəs öz işini vicdanla yerinə yetirməlidir”.

Füzuli Məmmədov futbolçularla münasibətlərinə də münasibət bildirib. O, komanda daxilində qarşılıqlı anlaşmanın olduğunu deyib:

“Futbolçular məndən nə istədiyimi yaxşı anlayırlar. Həmişə onlarla normal münasibət qurmağa çalışmışam. Təbii ki, oynamayan futbolçularda narazılıq ola bilər. Amma əsas məsələ komandanın birliyidir. Mən çox ambisiyalı insanam və məğlubiyyətləri qəbul etmək mənim üçün çətindir. Buna baxmayaraq hər oyunda komandanı qələbəyə kökləməyə çalışıram”.