“Mançester Yunayted”in kapitanı Bruno Fernandeş klub tarixində yeni rekorda imza atıb.
90plus.az xəbər verir ki, portuqaliyalı yarımmüdafiəçi azarkeşlər arasında keçirilən səsvermənin nəticələrinə əsasən, 2025/26 mövsümünün ən yaxşı futbolçusu seçilərək “Ser Mett Basbi” mükafatına layiq görülüb. Bu, Bruno Fernandeşin karyerasında sözügedən mükafatı beşinci dəfə qazanması ilə əlamətdar olub.
Beləliklə, təcrübəli futbolçu “Mançester Yunayted”in əfsanəsi Kriştiano Ronaldonu geridə qoyaraq klub tarixində bu mükafatı ən çox qazanan oyunçu adına sahib çıxıb. Ronaldo daha əvvəl dörd dəfə bu ada layiq görülmüşdü.
Bruno Fernandeş cari mövsümdə nümayiş etdirdiyi performansla komandanın əsas fiqurlarından birinə çevrilib. Maykl Kerrikin rəhbərliyi altında çıxış edən “qırmızı şeytanlar”ın UEFA Çempionlar Liqasına vəsiqə qazanmasında portuqaliyalı ulduz mühüm rol oynayıb.
Premyer Liqada 19 məhsuldar ötürmə edən Fernandeş turnirin tarixi rekorduna da yaxınlaşıb. Hazırda bir mövsümdə ən çox assist göstəricisi Tyerri Anri və Kevin De Bruyneyə məxsusdur — hər iki futbolçu 20 məhsuldar ötürmə ilə yadda qalıb.
2020-ci ildə “Mançester Yunayted”ə transfer olunan Bruno Fernandeş qısa müddətdə azarkeşlərin ən sevimli futbolçularından birinə çevrilib. O, artıq klubun heyətində 325 oyunda meydana çıxıb.
Qeyd: Bruno Fernandeş daha əvvəl 2020, 2021, 2024 və 2025-ci illərdə də mövsümün ən yaxşı futbolçusu seçilmişdi.
