Bu gün Avropa Liqasında II təsnifat mərhələsinə start verilib və bütün ilk oyunlar eyni gündə keçirilib.

90plus.az xəbər verir ki, Türkiyənin “Beşiktaş” klubu evdə Ukraynanın Arda Turanın rəhbərlik etdiyi “Şaxtyor” komandasını qəbul edib. Qonaqlar İstanbul səfərindən 4:2 hesablı qələbə ilə ayrılıblar.

“Beşiktaş” avrokuboklar tarixində ilk dəfə təsnifat mərhələsində ev oyununda uduzdu. 

“Qara qartallar” bu mərhələdəki ilk ev məğlubiyyətini “Şaxtyor” qarşısında 2:4 hesabı ilə aldı.

Buna qədər: 22 qələbə – 4 heç-heçə.

Azərbaycan təmsilçisi “Sabah” üçün də bu turun bəzi nəticələri əhəmiyyət daşıyır. Belə ki, Konfrans Liqasında “Petrokub”la dueldən qalib ayrılacaq komanda III təsnifat mərhələsində Avropa Liqasındakı “Levski” – “Braqa” cütünün məğlubu ilə qarşılaşacaq. Bolqarıstan və Portuqaliya təmsilçiləri arasında baş tutan ilk görüşdə hesab açılmayıb – 0:0.

Digər oyunlara gəlincə, “Banik” və “Legiya” 2:2 hesablı heç-heçə ilə kifayətləniblər. “Utrext” səfərdə “Şerif”ə 3:1 hesabı ilə qalib gəlib. Danimarka və Şotlandiya klublarının duelində – “Midtülland” – “Hibernian” matçında da qalib müəyyənləşməyib – 1:1. Eyni nəticə “Çelye” – AEK qarşılaşmasında da qeydə alınıb.

“Luqano” və ÇFR arasındakı matçda isə hesab açılmayıb. “Anderlext” doğma meydanda “Hakken”ə 1:0 hesabı ilə qalib gəlib.

Qeyd: Cavab görüşləri iyulun 31-də keçiriləcək.