“Şamaxı”dan məğlubiyyət sonrası etiraflar — Abbasovdan zədə, yorğunluq və gələcək açıqlama gəldi.

90plus.az xəbər verir ki, Misli Premyer Liqasının 31-ci turunda "Şamaxı" səfərdə "Neftçi"yə 0:3 hesabı ilə məğlub olub. Oyundan sonra komandanın baş məşqçisi Ayxan Abbasov həm matç, həm də mövsümün ümumi gedişi ilə bağlı fikirlərini bölüşüb.

Abbasov rəqibi qələbəyə görə təbrik edərək, oyunun “Neftçi” üçün xüsusi əhəmiyyət daşıdığını vurğulayıb:

“Rəqibi təbrik edirəm, layiqli qələbə qazandılar. Bilirdik ki, bu, onlar üçün final xarakterli oyundur.”

Mütəxəssis komandanın əvvəlki turda ağır zədə alan David Santosun yoxluğundan təsirləndiyini də gizlətməyib:

“David Santosun ağır zədələnməsi komandada istər-istəməz ruh düşkünlüyü yaratdı. Ona Allahdan şəfa diləyirəm.”

Onun sözlərinə görə, mövsümün son mərhələsində bəzi komandalar üçün oyunlar formal xarakter daşısa da, “Şamaxı” üçün hər matç məsuliyyətlidir:

“Son ev oyunumuz var — Turan Tovuzla görüş. Həmin matça hazırlaşacağıq. Bu gün də bəzi yeni oyunçulara şans verdik.”

Ardıcıl iki oyunda ağır məğlubiyyətlər və qapılarda 6 qol görmələri ilə bağlı suala isə Abbasov daha geniş kontekstdən yanaşıb. O, əsas səbəblərdən biri kimi yorğunluğu göstərib:

“Təqvim çox ağır idi, avrokuboklara və çempionluğa oynayan rəqiblərlə qarşılaşdıq. Futbolçular yorulublar, zədələr oldu. Görünür ki, artıq tətili gözləyirlər. Bunu da müəyyən qədər normal qarşılamaq olar.”

Baş məşqçi komandanın ümumi performansını isə sərt şəkildə qiymətləndirməyib:

“Bütün çətinliklərə baxmayaraq, futbolçulardan razıyıq. Onlar bu mövsümdə can qoydular. Azarkeşləri sevindirmək istəyirdik, amma bu gün alınmadı.”

Sonda Abbasov gələcəyi ilə bağlı yayılan söz-söhbətlərə də aydınlıq gətirib və mövsümün sonunda Şamaxıdan ayrılacağını təsdiqləyib:

“Klub rəhbərliyi ilə danışmışıq, vəziyyət bəllidir. Mövsümün sonunda ayrılacağam. İstərdim ki, son iki oyunu xal ilə bitirək.”

O, yeni iş yeri barədə yayılan iddiaları isə təkzib edib və hazırda heç bir klubdan rəsmi təklif almadığını bildirib:

“‘Şəfa’ barədə heç bir söhbət olmayıb. Hələ heç bir klubdan təklif yoxdur. Gələcəkdə nə olacağını zaman göstərəcək.”