"Fənərbağça" və "Beşiktaş" “Fatih Karagümrük"də çıxış edən italyan futbolçu Fabio Borini ilə maraqlanır. 90plus.az “Trt Spor”a istinadən xəbər verir ki, hər iki klub oyunçunun transferi üçün hərəkətə keçib. Hücumun hər iki cinahında və hücumçu mövqeyində oynaya bilən 31 yaşlı Borini “Fatih Karagümrük”dəki çıxışı ilə yaxşı təsir bağışlayıb. İtaliyalı futbolçu bu mövsüm "qırmızı-qaralar"ın heyətində keçirdiyi 19 matçda 13 qol vurub, 7 məhsuldar ötürmə edib. “Çelsi”, “Liverpul”, “Roma” və “Milan” kimi Avropanın önəmli komandalarında da forma geyinən Borini 2020-ci ilin sentyabrında yarım mövsüm oynadığı “Hellas Verona” ilə yollarını ayırıb. Təcrübəli oyunçu 2021-ci ilin yanvarında ara transfer dövründə Super Liqa təmsilçisi “Fatih Karagümrük”lə anlaşıb. İstanbul komandasının forması ilə ümumilikdə 63 rəsmi oyuna çıxan Borini 28 qol vurub, 13 məhsuldar ötürmə edib.