Türkiyə Superliqasında "Rizesppor"la oyundan (1:1) sonra hakim Halil Umut Meleri yumruqla vuran “Ankaragücü”nün sabiq prezidenti Faruk Koca həbsdən azad edilib. 90plus.az Türkiyə "sporarena"ya istinadən xəbər verir ki, F.Kocanın vəkilləri istintaqın davam etdiyi müddət ərzində onun həbsdə qalmasına etiraz ediblər. Etirazı dəyərləndirən Növbətçi Ankara Qərb Ağır Cəza Məhkəməsi F.Kocanın məhkəmə nəzarəti altında azadlığa buraxılmasına qərar verib. O, axşam saatlarında həbsxanadan təxliyə edilib.  Hakimin döyülməsinə görə F.Koca ilə birlikdə həbs edilən Yunus Şahin və Kenan Çetinkayanın həbsi isə davam edir. Sözügedən üç şəxslə bağlı istintaq davam etdirilir. Qeyd: daha əvvəl Türkiyə Superliqasında mübarizə aparan “Ankaragücü”nün prezidenti Faruk Koca “Rizespor”a qarşı keçirdikləri matçdakı idarəçilikdən narazı qalaraq final fitindən sonra baş hakim Halil Umut Meleri yumruqla vurub. Daha sonra F.Koca həbs olunub. Həmçinin o, dekabrın 15-də Türkiyə Futbol Federasiyası tərəfindən futboldan ömürlük uzaqlaşdırılıb. "Ankaragücü" isə 2 milyon türk lirəsi məbləğində cərimələnib. Bundan başqa, komanda 5 ev oyununu azarkeşlər və klub rəsmiləri olmadan keçirməlidir.