“Milan”da gərginlik pik həddə – azarkeşlər icraçı direktor Ciorcio Furlanini hədəfə aldı.
90plus.az xəbər verir ki, “Milan” klubu daxilində böhran dərinləşir. “San Siro”da keçirilən son matç öncəsi və oyun zamanı azarkeşlər klubun baş icraçı direktoru Ciorcio Furlaniyə qarşı açıq etiraz aksiyası keçiriblər.
Tribunalarda hazırlanan xüsusi xareoqrafiyada işıqlarla “GF OUT” yazısı göstərilib, azarkeşlər isə “Furlani, rədd ol” şüarları səsləndiriblər. Etirazlar yalnız stadionla məhdudlaşmayıb – oyundan əvvəl “San Siro” ətrafında günboyu davam edən aksiya da təşkil olunub.
Hazırda “Milan” üçün vəziyyət həm meydanda, həm də meydandan kənarda ağırdır. Komanda “Atalanta”ya qarşı 2:0 hesabı ilə geridə idi, eyni vaxtda isə “Roma”nın “Parma” üzərində qələbəsi “rossoneri”nin Çempionlar Liqasına vəsiqə uğrunda mövqeyini daha da təhlükəyə atıb.
Amma narazılıq təkcə nəticələrlə bağlı deyil. Klub daxilində baş məşqçi Massimiliano Alleqri, idman direktoru İqli Tare və xüsusilə də CEO Ciorcio Furlani ətrafında qeyri-müəyyənlik artmaqdadır.
Azarkeşlər tərəfindən yayılan fanzinlərdə və bəyanatlarda rəhbərliyin klubun tarixi və kimliyini zədələdiyi iddia olunur. Orada qeyd edilir ki, uğurlu komanda lazımi transferlərlə gücləndirilmək əvəzinə zəiflədilib və qərarların əsasən maliyyə maraqlarına görə verildiyi vurğulanır.
Mətnlərdə xüsusilə transfer siyasəti tənqid olunur, klubun “insan və idman dəyərlərindən uzaqlaşdığı”, San Siro atmosferinin isə “ruhunu itirdiyi” qeyd edilir.
Matçdan əvvəl tribunada “Furlani, get!” banneri açılıb və oyun zamanı da etiraz şüarları davam edib.
Mövcud vəziyyətə görə, klub rəhbərliyi ilə azarkeşlər arasında gərginliyin daha da artacağı istisna olunmur. “Milan”da böhran artıq yalnız nəticələr deyil, idarəetmə səviyyəsində də ciddi suallar doğurur.
