Süper Liqanın 4-cü turu çərçivəsində bu axşam "Trabzonspor"un qonağı olan "Samsunspor" klubu matç öncəsi (1-1) acı bir hadisə ilə üzləşib.
90plus.az xəbər verir ki, "Samsunspor" klubunun rəsmi açıqlamasına görə, komandanı dəstəkləmək üçün Trabzona yola düşən azarkeş qrupuna hücum edilib. Baş verən hadisə nəticəsində bir azarkeş həyatını itirib, bir nəfər isə yaralanıb.
"Samsunspor"dan başsağlığı mesajı
Klubdan verilən açıqlamada aşağıdakı ifadələr yer alıb:
“Samsunspor’umuzu dəstəkləmək məqsədilə səfər yoluna çıxan azarkeşlərimizə qarşı edilən hücumu dərin bir kədərlə öyrəndik. Baş vermiş acı hadisədə bir azarkeşimiz həyatını itirib, bir azarkeşimiz isə yaralanıb. Həlak olan azarkeşimizə Allahdan rəhmət, kədərlənən ailəsinə və bütün camiəmizə başsağlığı diləyir, yaralı azarkeşimizə təcili şəfa arzulayırıq. Bu mənfur hücumun məsuliyyətini daşıyan şəxslərin ən ağır şəkildə cəzalandırılması üçün hüquqi prosesin sonuna qədər izləyicisi olacağımızı ictimaiyyətin diqqətinə çatdırırıq.”
Hadisə ilə bağlı hüquq-mühafizə orqanları tərəfindən araşdırma başladılıb.
