35 yaşlı almaniyalı futbolçu, “Salernitana” klubunun müdafiəçisi Jerom Boatenqin anası öz oğlunu qadınlara qarşı zorakılıqda günahlandırıb. 90plus.az xəbər verir ki, futbolçunun anası “Spiegel” nəşrinə bu barədə məktub yazıb. Məktubda belə deyilir: “ Oğlum illərdir qadınları mənəvi və fiziki təhqir edib. Kasia Lenhardt intihar etdi ". Model Kasia Lenhardt 2019-2021-ci illərdə Boatenqlə sevgili olub. 9 fevral 2021-ci ildə 25 yaşlı Lenhardt Berlin-Şarlottenburq rayonundakı mənzildə ölü tapılıb. O intihar edib. Berlin hüquqşünaslarından biri təsdiqləyib ki, Lenhardt ölümündən bir müddət əvvəl Boatenqin onu təhqir etdiyi barədə polisə şikayət ərizəsi vermək istəyib. Bundan əlavə, nəşrin əlində 2019-cu ildə göndərilmiş mesajlar var ki, bu mesajlarda Lenhardt Boatenqi fiziki zorakılıqda ittiham edir. Model bildirib ki, futbolçu az qala onun sol əlindəki baş barmağını sındıracaqmış. “ Davam edən məhkəmə çəkişmələri səbəbindən müştərimiz hazırda suallara ətraflı cavab verə bilmir. Çox şey barədə yanlış məlumat verilib ”, - deyə Boatenqin vəkili “Spiegel”in sorğusuna cavab verib. Mənbə: Goal