"Fənərbağça"nın polşalı ulduz futbolçusu Sebastian Şimanski üçün transfer bazarında maraqlı hadisələr yaşanır.
90plus.az xəbər verir ki, İtaliyanın "Latsio" klubu 26 yaşlı yarımmüdafiəçiyə 15 milyon avro təklif etməyə hazırlaşır. "Fənərbağça" rəhbərliyi bu təklifi diqqətlə qiymətləndirir.
Sebastian Şimanski 2023-cü ilin yayında "Dinamo Moskva"dan 9,75 milyon avro qarşılığında "Fənərbağça"ya transfer olunub. O, bu müddət ərzində komandanın əsas oyunçularından biri olub və cari mövsümdə 51 rəsmi oyunda 7 qol və 9 assistlə yadda qalıb. Baş məşqçi Joze Mourinyo Şimanskini mərkəzdə əsas oyunçu hesab edir və onun komandada qalmasını istəyir.
Daha əvvəl Almaniyanın "Freyburq" klubu da Şimanski üçün 15 milyon avro təklif etmişdi, lakin "Fənərbağça" bu təklifi qəbul etmədi. Klub yalnız 25 milyon avro və bonuslar daxil olmaqla daha yüksək bir təkliflə razılaşacağını açıqlayıb.
Hazırda "Fənərbağça" rəhbərliyi Şimanski transferi ilə bağlı qərar vermək üçün yeni oyunçuların alınmasının vacib olduğunu bildirir. Mourinyo isə Şimanski getməsi halında yarımmüdafiə xəttinə yeni oyunçu gətirilməsinin zəruriliyini vurğulayır.
Görünür, "Fənərbağça" yüksək qiymət almadıqca Şimanski satmaq niyyətində deyil. Bu qərar həm klubun maliyyə vəziyyətinə müsbət təsir göstərəcək, həm də komandanın gələcək planlarını formalaşdıracaq.
"Fənərbağça" rəhbərliyi yaxın günlərdə bu mövzuda son qərarını açıqlayacaq.
