"Santos"un hücumçusu Neymar Braziliya A Seriyası matçında ayağından zədə alaraq meydanı göz yaşları içində tərk edib.

90plus.az xəbər verir ki, daha öncə "Fluminense" ilə qarşılaşmada bud zədəsi ilə altı həftəlik aradan sonra yaşıl meydanlara qayıdan 33 yaşlı futbolçu "Atletiko Mineyro" ilə oyunda da zədə alır.

“Barselona”nın keçmiş forvardı "Santos"un “Vila Belmiro” stadionunda 100-cü çıxışını qeyd etmək üçün 100 nömrəli xüsusi forma da geyinmişdi.
Tibbi heyət onun davam edə bilməyəcəyinə qərar verdi və emosional Neymar onu altı həftə kənarda saxlayan sol bud nahiyəsini tutaraq arabada meydandan çıxarıldı.

Göz yaşı tökən Neymara həm komanda yoldaşları, həm də Braziliyada keçmiş komanda yoldaşı və rəqib komandanın forvardı Hulk təsəlli verdi.

"Əl-Hilal" klubundan "Santos"a qayıtdıqdan sonra səkkiz oyuna çıxıb, üç qol və üç assistlə yadda qalan Braziliya millisinin rekordçusu olan Neymar 2023-cü ilin oktyabrından - ön çarpaz bağını cırdıqdan sonra milli komandada da oynamır.
Forvard Argentina və Kolumbiyaya qarşı Dünya Çempionatının seçmə mərhələsində Braziliya yığmasının heyətində yer alıb, lakin zədədən sonra komandanı tərk etmək məcburiyyətində qalıb.