"Qol sayına və hesaba baxanda yaxşı oyun oldu. Amma daha inamlı çıxış edə bilərik. Getdikcə komandada keyfiyyət daha da artacaq". 90plus.az - ın məlumatına görə, bunu "Neftçi"nin baş məşqçisi Laurentsiu Regekampf evdə "Səbail"ə 3:0 hesabı ilə qalib gəldikləri Azərbaycan Premyer Liqasının XXIII tur oyunundan sonra mətbuat konfransında deyib. Rumıniyalı mütəxəssis oyundakı ilk penalti epizodu zamanı Emin Mahmudovun topu Kenni Sayefə verməsini şərh etmək istəmədiyini bildirib: "Komandada penaltini kimin vurduğunu hamı bilir. Mahmudov topu Sayefə verdi. Sonuncu zərbəni dəqiq yerinə yetirməsəydi, kapitanı cəzalandıracaqdım". XXIV turda "Qarabağ"a qarşı keçirəcəkləri görüşə də toxunan Regekampf Ağdam təmsilçisinin sıx qrafikda oynamağa öyrəşdiyini və bunun rəqib üçün problem olmayacağını söyləyib: "Onların böyük təcrübəsi var. Əminliklə deyə bilərəm ki, bizə qarşı yaxşı oynayacaqlar. Azərbaycan üçün "Qarabağ"ın mərhələ adlamasını istəyərəm. Bu, ölkə futbolu və imici üçün önəmlidir. Hər iki komandanı çətin oyun gözləyir. Qələbə qazanmaq istəyiriksə, rəqibə problemlər yaratmalı, sürətli oynamalı və axmaq səhvlər etməməliyik. Bugünkündən daha yaxşı çıxış etməliyik. Düşünürəm ki, bu mümkündür. Komandamız keyfiyyətli oyunçulardan ibarətdir. Bu cür matçları sevirəm. Ümid edirəm kİ. səfərdə qələbə qazanacağıq". Baş məşqçinin sözlərinə görə, bütün futbolçuların sərəncamında olması çox vacibdir: "Onlar artıq bir-birini tanımağa başlayıblar. Birlikdə oynamaları önəmlidir. Bugünədək zədə ilə bağlı belə halla üzləşməmişdik. Rəqiblər də bizi analiz edirlər. Hər oyunda ortaya yeni nəsə qoymağa çalışacağıq".