Misirli hücumçu Mohamed Salah “Aston Villa”ya 2:4 hesablı məğlubiyyətdən sonra "Liverpul" azarkeşlərinə emosional mesaj ünvanlayıb və komandanın çətin keçən Premyer Liqa mövsümündə gözləntilərin altında qaldığını etiraf edib.
90plus.az xəbər verir ki, Salah şənbə günü “X” hesabında paylaşdığı geniş bəyanatda “Liverpul”un problemlərindən açıq danışıb və növbəti uğursuz nəticədən sonra azarkeşlərin yaşadığı məyusluğu başa düşdüyünü bildirib.
Misirli futbolçu klubun son illərdə keçdiyi yolu xatırladaraq, “Liverpul”u vaxtilə Avropanın ən qorxulu komandalarından birinə çevirən kimliyi yenidən tapmağın vacibliyini vurğulayıb.
“Mən bu klubun şübhə ilə yanaşılan komandadan inananlara, sonra isə çempionlara çevrildiyini görmüşəm.
Bu səviyyəyə çatmaq üçün inanılmaz dərəcədə çox çalışmaq lazım idi və mən də həmişə klubun buna nail olması üçün əlimdən gələni etmişəm. Heç nə mənə bundan daha böyük qürur vermir.
Bu mövsüm yenidən məğlubiyyətlər içində olduğumuzu görmək çox ağrılıdır və azarkeşlərimiz buna layiq deyil. Mən “Liverpul”u rəqiblərin qorxduğu o ağır metal kimi hücum futbolu oynayan və yenidən kuboklar qazanan komanda kimi görmək istəyirəm.
Mənim bildiyim futbol budur və yenidən tapmalı, birdəfəlik sahib çıxmalı olduğumuz kimlik də məhz budur”.
“Bu məsələ müzakirə mövzusu olmamalıdır və kluba qoşulan hər kəs buna uyğunlaşmalıdır. Arabir bir neçə oyun qazanmaq “Liverpul”u ifadə etməməlidir. Bütün komandalar oyun qazanır”, – deyə o bildirib.
Salahın bu açıqlamaları “Liverpul”un qeyri-sabit nəticələr və klubun ambisiyaları ətrafında artan təzyiqlərlə yadda qalan mövsümdə növbəti ağır zərbəni almasından sonra gəlib.
Məyusluğa baxmayaraq, hücumçu komandanın gələn mövsüm UEFA Çempionlar Liqasına vəsiqə qazanmaq üçün sona qədər mübarizə aparacağını vurğulayıb.
Hazırda ilk “5-lik” uğrunda mübarizə “Liverpul”un mövsümün son həftələrində əsas hədəfinə çevrilib.
“Liverpul” həmişə mənim və ailəmin həyatında böyük yer tutan klub olacaq. Mən ayrıldıqdan sonra da onun uğurlu olmasını istəyirəm.
Həmişə dediyim kimi, növbəti Çempionlar Liqasına vəsiqə qazanmaq minimum tələbdir və bunun baş verməsi üçün əlimdən gələni edəcəyəm”, – deyə Salah əlavə edib.
Bu bəyanat Salahın “Liverpul”dakı dövründə ən sərt ictimai reaksiyalarından biri hesab olunur və komandanın uğursuz nəticələr seriyasından sonra gərgin dönəmdə səsləndirilib.
Təzyiqin artdığı və “Liverpul”un 5-ci yer uğrunda “Bornmut”la rəqabət apardığı bir vaxtda, misirli ulduzun mesajı mövsümün son oyunları öncəsi komandanın sabitliyini bərpa etməsinin vacibliyini bir daha gündəmə gətirib.
