Tomas Parti Londondakı Sautuork Kral Məhkəməsində keçirilən iclas zamanı ona qarşı irəli sürülən iki əlavə zorlanma ittihamı üzrə özünü təqsirli bilmədiyini bildirib.

90plus.az xəbər verir ki, hazırda “Vilyarreal”da çıxış edən və Qana millisinin üzvü olan yarımmüdafiəçi daha əvvəl iki qadınla bağlı beş zorlanma ittihamını, eləcə də 2021–2022-ci illər arasında üçüncü qadınla əlaqədar bir cinsi təcavüz ittihamını da rədd etmişdi.

Son ittihamlar 2020-ci ilin dekabr ayına aid olduğu iddia edilən və dördüncü şikayətçi ilə bağlı hadisə ilə əlaqədardır. Parti bazar ertəsi keçirilən dinləmədə bu yeni ittihamlar üzrə də özünü təqsirli bilmədiyini bəyan edib.

İddia olunan hadisələrin onun ötən yay İspaniyaya transferindən əvvəl, “Arsenal”da çıxış etdiyi dövrdə baş verdiyi bildirilir.

32 yaşlı futbolçu məhkəmə prosesi öncəsi zaminə buraxılıb. Əvvəlcə noyabr ayına planlaşdırılan məhkəmə prosesinin gecikə biləcəyi qeyd olunur.

Parti 2020-ci ildə “Atletiko Madrid”dən “Arsenal”a 50 milyon avro qarşılığında transfer olunmuş və müqaviləsinin bitməsinə qədər komandanın əsas yarımmüdafiəçilərindən biri olmuşdu.