“Fənərbağça” “Al Nassr”dən Con Duranı icarəyə götürdü – Azarkeşlər Atatürk Hava Limanına axışdı.
90plus.az xəbər verir ki, “Fənərbağça” növbəti transferini reallaşdırıb. İstanbul təmsilçisi Kolumbiya millisinin üzvü, hücumçu Con Duranı “Al Nassr” klubundan icarəyə götürüb.
Transfer üzrə etibarlı mənbə olan jurnalist Fabrisio Romanonun məlumatına görə, Duran 2025-ci ilin yayına qədər “Fənərbağça” formasını geyinəcək. Futbolçunun maaşının tam şəkildə İstanbul klubu tərəfindən qarşılanacağı bildirilib.
“Fənərbağça” azarkeşləri Atatürk Hava Limanında Con Duranı qarşılayır:
Transferə dair maraqlı detallardan biri də “Mançester Yunayted”lə bağlıdır. Belə ki, “Al Nassr” tərəfi kolumbiyalı hücumçunu icarəyə verməyi və maaşını tam qarşılamağı təklif etsə də, “qırmızı şeytanlar” bu variantı rədd edib.
Hazırda Con Duranın İstanbula gəlişi səbəbindən “Fənərbağça” azarkeşləri Atatürk Hava Limanında toplaşıb. İsti hava şəraitinə baxmayaraq, sarı-göylü fanatlar yeni hücumçunu coşqu ilə qarşılayıblar.
Duranın bu gün tibbi müayinədən keçməsi və yaxın saatlarda rəsmi təqdimatının baş tutması gözlənilir.
