Sadettin Saran “Fənərbağça”nın prezidenti olmaq üçün ilk konqresdə namizədliyini açıqladı.

90plus.az xəbər verir ki, “Fənərbağça”nın gələcək prezidenti olmaq istəyən Sadettin Saran ilk konqresdə klubun rəhbərliyinə namizədliyini irəli sürəcəyini açıqlayıb. Saran həmçinin davam edən imza toplama kampaniyasına qarşı olduğunu da vurğulayıb.

Sadettin Saran bildirib:

“Böyük “Fənərbağça” ailəsinə və hörmətli ictimaiyyətə, son aylarda klubumuzda baş verən inkişafları bütün “Fənərbağça”sevərlər kimi yaxından izləyirik. Düşüncələrimiz və mövqeyimiz bizə yaxın olan hər kəs tərəfindən məlum olsa da, indi onları ictimaiyyətlə də bölüşməyin vaxtı gəldiyinə inanırıq.

“Fənərbağça” yalnız basketbolda Avropanın zirvəsində olan bir klub deyil, bütün idman növləri ilə birlikdə dünyanın ən böyük idman klublarından biridir. Bu böyük klubun təbii tələbi olaraq, futbol komandamızın hər zaman zirvədə olması qaçılmazdır.

Son zamanlar klubda yaranan narazılıq nəticəsində başlayan “növbədənkənar konqres imza kampaniyası” hər bir “Fənərbağça”sevərin hörmət etdiyi demokratik hüquqdur və belə də qiymətləndirilir.

Lakin biz seçilmiş rəhbərliklərin bu cür üsullarla vəzifədən uzaqlaşdırılmasını düzgün saymırıq. “Fənərbağça” keçmişdə ən böyük rəqibə qarşı belə ən çətin dövrlərdə belə bu cür addımlara yol verməyəcək bir ailədir. Buna görə də, biz bu imza kampaniyasına dəstək vermədik və onun bir hissəsi olmadıq.

İmza kampaniyasının nəticəsindən asılı olmayaraq, prezidentliyə namizədliyimizlə bağlı mövqeyimiz belədir: “Fənərbağça”nı gözlənilən çempionluqlara ən qısa zamanda daşımaq məqsədilə ilk keçiriləcək konqresdə, hər hansı şərt qoymadan, yoldaşlarımızla birlikdə bu böyük məsuliyyətə namizədik.

Heç bir “Fənərbağça”sevərin bu məsələdə ən kiçik bir şübhəsinin olmamasını xahiş edirəm. Hörmətlə.”