Qurban Qurbanov: “Motivasiya yerindədir, Avropa Liqasına vəsiqəni təmin etdik”.
90plus.az xəbər verir ki, "Qarabağ" Misli Premyer Liqasının 32-ci turunda "İmişli" üzərində 3:0 hesablı qələbədən sonra baş məşqçi Qurban Qurbanov oyunu şərh edib.
Təcrübəli mütəxəssis komandasının vacib qələbə qazandığını və bununla da Avropa Liqasına vəsiqəni rəsmiləşdirdiklərini bildirib:
“Futbolçularımı təbrik edirəm. Bu qələbə ilə Avropa Liqasına vəsiqəni təmin etdik. Bəlkə də oyun keyfiyyət baxımından ideal deyildi, amma nəticə bizim üçün vacib idi. Rəqib yaxşı müdafiə olunurdu və sürətli əks-hücumlara çıxırdı. Buna baxmayaraq, motivasiya yerində idi və qələbəni qazandıq”.
Qurbanov “İmişli”nin çıxışını da dəyərləndirib və onları liqadakı ilk mövsüm münasibətilə təqdir edib:
“İmişli Premyer Liqadakı ilk mövsümünü keçirir və çox yaxşı təsir bağışlayır. Onlara da xüsusi təşəkkür düşür”.
"Qarabağ"ın baş məşqçisi Kipr klubunda çıxış edən futbolçu ilə razılaşma barədə xəbərləri qəti şəkildə təkzib edib:
“Mətbuatda Kipr klubunda çıxış edən futbolçu ilə anlaşdığımızla bağlı xəbərlər var. Bu, nə dərəcədə doğrudur? – Hazırda heç bir futbolçu ilə rəsmi razılaşmamız yoxdur. Bir çox oyunçu ilə danışıqlar aparırıq. Bəziləri mövsümün sonunu gözləyir, bəziləri düşünür”.
“Transfer bazarı dəyişib” – sərt etiraf
Qurbanov transfer prosesinin əvvəlki illərlə müqayisədə daha çətinləşdiyini də etiraf edib. Onun sözlərinə görə, Avropadakı klubların artan səviyyəsi Azərbaycan klublarının işini çətinləşdirir:
“Komandanın Çempionlar Liqasında, yaxud Avropa Liqasında çıxış etməsi klubun transfer fəaliyyətinə və futbolçuların qərarına təsir göstərmir. Ötən mövsüm Çempionlar Liqasında oynayanda bunun canlı şahidi olduq. Avropanın orta səviyyəli ölkələrinin klublarında şərait o qədər yaxşılaşıb ki, oyunçular Azərbaycana gəlməyə isti yanaşmırlar”.
Musa Qurbanlı və Bədavi Hüseynov
Musa Qurbanlı barədə danışan baş məşqçi onun zədəsinin Avropa Liqasına qədər sağalmasının çətin olduğunu bildirib.
Bədavi Hüseynov barədə isə Qurbanov onun komandada qalma ehtimalının yüksək olduğunu vurğulayıb:
“O, son oyunlarda yaxşı çıxış edir. Böyük ehtimalla komandada qalacaq, amma hələ yekun qərar yoxdur”.
