Kaşkilya: “İmişli” üçün əsas hədəf artıq yerinə yetirilib, indi gənclərə şans veririk".
90plus.az xəbər verir ki, "İmişli FK"nın baş məşqçisi Jorj Kaşkilya Misli Premyer Liqasının 32-ci turunda "Qarabağ"a 0:3 hesablı məğlubiyyətdən sonra oyunu dəyərləndirib.
Portuqaliyalı mütəxəssis matçın iki fərqli hissəyə bölündüyünü bildirib və komandasının xüsusilə ilk yarıda rəqibə qarşı mübarizə apardığını qeyd edib:
“İlk hissədə bərabərsəviyyəli oyun oldu. "Qarabağ" hücumda daha çox görünürdü, amma biz də əks-hücumlarda təhlükəli idik. Müdafiədə ilk 45 dəqiqə yaxşı çıxış etdik. Lakin ikinci hissənin əvvəlində buraxdığımız qol planımızı pozdu. Daha sonra ikinci qoldan sonra komanda motivasiyanı itirdi və son 20 dəqiqə tam rəqibin nəzarətində keçdi. Nəticə oyunun gedişinə uyğundur. Qarabağı həm qələbə, həm də Avropa Liqasına vəsiqə münasibətilə təbrik edirəm”.
Kaşkilya bildirib ki, ikinci hissədə əsas diqqət gənc futbolçuların meydanda sınanmasına yönəlib:
“Biz artıq hədəfimizə əvvəlki turlarda çatmışıq. Buna görə də gənc yerli futbolçulara şans vermək bizim üçün vacibdir. Bu, onların inkişafı üçün böyük təcrübədir”.
Komandanın gələcəyi və onun mümkün gedişi ilə bağlı yayılan xəbərlərə isə məşqçi belə cavab verib:
“Bu xəbərlər doğru deyil. Mənim əsas diqqətim mövsümün sonuna qədər ‘İmişli’nin oyunlarına yönəlib. Mövsüm bitəndən sonra isə Portuqaliyaya qayıdacağam”.
O, həmçinin zədəli futbolçu Sinenkanın vəziyyətinə də toxunub:
“Sinenka bizimlədir və məşqlərdə iştirak edir, amma vəziyyəti hələ tam aydın deyil”.
Qeyd: “İmişli” mövsümün son turlarında gənc futbolçulara daha çox şans verməyi planlaşdırır.
