Nuno Espirito Santo Premyer Liqanı tərk etsə də, “Vest Hem”də qalacaq.
90plus.az xəbər verir ki, Premyer Liqanı tərk edən “Vest Hem” baş məşqçi Nuno Espirito Santo ilə yola davam etmək qərarı verib.
London klubunun rəhbərliyi və portuqaliyalı mütəxəssis bazar ertəsi görüş keçirib. Tərəflərin müqaviləyə qarşılıqlı razılıq əsasında xitam vermək imkanı olsa da, əməkdaşlığın davam etdirilməsi qərara alınıb.
“Vest Hem” klubunun azarkeşlərə ünvanladığı açıq məktubda Nuno Espirito Santonun komandaya bağlılığını davam etdirdiyi vurğulanıb:
“Nuno açıq şəkildə bildirdi ki, komandaya ilk cəhddəcə Premyer Liqaya qayıtmaq üçün maksimum motivasiyaya sahibdir. Bu, gələn mövsüm üçün mübahisəsiz əsas məqsəd olmalıdır”.
Klub rəhbərliyi həmçinin mütəxəssisin daha əvvəl “Vulverhempton”la Çempionşipdə qazandığı uğuru xatırladıb. Nuno 2017/18 mövsümündə “canavarlar”ı 99 xalla çempion edərək Premyer Liqaya yüksəltmişdi.
“Vest Hem” 2012-ci ildən sonra ilk dəfə Premyer Liqanı tərk edib. Klubun təxminən 200 milyon funt sterlinq gəlir itkisi yaşayacağı bildirilir. Bu səbəbdən Cerrod Bouen və Mateuş Fernandes kimi aparıcı futbolçuların satışı qaçılmaz görünür.
Buna baxmayaraq, klub rəhbərliyi Nunonun komandada müsbət dəyişikliklər yaratdığına inanır. “Vest Hem” son 17 Premyer Liqa matçında 25 xal toplayıb və bu göstərici tam mövsüm üzrə hesablandıqda yeddinci yerə bərabər olub.
Klub rəhbərliyi azarkeşlərlə münasibətlərin bərpasının da əsas prioritetlərdən biri olduğunu bildirib. “Vest Hem” gələn mövsüm üçün mövsümlük biletlərin qiymətində 30 faizə qədər endirim tətbiq edəcəyini açıqlayıb.
