Türkiyənin “Qalatasaray” klubu gecə saat 00:00-da Qalata Qülləsində möhtəşəm işıq şousu təşkil edib.
90plus.az xəbər verir ki, sarı-qırmızıların sosial şəbəkə paylaşımında yer alan bir görüntü isə azarkeşlərin diqqətindən yayınmayıb. Videoda Leroy Sanenin fonunda görünən bir sima “Mançester Siti”nin ulduzu Bernardo Silvaya bənzədilib.
Şounun anonsu saat 22:50-də “Bu gecə saat 00:00-da İstanbulun müşahidə nöqtəsində nə baş verəcək?” başlığı ilə verilib. Paylaşımda yer alan “Tarixə düşəcək o anlar” ifadəsi “Qalatasaray” azarkeşlərini həyəcanlandırıb və saat 00:00-a qədər gözləmə yaratmışdı.
Gecə yarısı “Qalatasaray” rəsmi YouTube kanalında “Çempionlar Liqasının işıqlarını yandırırıq” başlıqlı canlı yayına start verib. Tədbir çərçivəsində Qalata Qülləsində xüsusi işıqlandırma nümayiş olunub.
Yayım zamanı Çempionlar Liqasının musiqisi ilə birgə aslan nəriltisi səsləndirilib və ekranlarda Leroy Sanenin görüntüləri əks olunub. Bu kadrların arxa planında görünən bir üz isə sosial şəbəkələrdə müzakirələrə səbəb olub. Azarkeşlər həmin simanı Bernardo Silvaya bənzədiblər.
Bundan əlavə, yayımda Portuqaliya bayrağını xatırladan bir vizualın görünməsi Bernardo Silvanın “Qalatasaray”a keçidi ilə bağlı iddiaları daha da artırıb.
Təxminən 8 dəqiqə davam edən şounun sonunda “Qalatasaray” bu anları sosial şəbəkə hesabında “Biz daha yaxşısını edincə, ən yaxşısı budur” şərhi ilə bölüşüb.
Leroy Sane də bu paylaşımı “Qalatasaray xoşbəxtlikdir!” sözləri ilə paylaşaraq əlavə maraq yaradıb.
