Mövsümü bir cüt kubokla tamamlayan “Qalatasaray”da transfer sahəsində diqqətçəkən hadisələr yaşanır. Dünyaca tanınmış ulduzlarla danışıqlarını davam etdirən İstanbul klubu bu dəfə də ingilis futbolçu Rahim Sterlinq ilə maraqlanır.

90plus.az xəbər verir ki, “Sarı-qırmızılılar”ın 30 yaşlı ulduz futbolçu ilə ilk əlaqəsi müsbət nəticələnib.

Klub rəhbərliyi bu mövsüm “Arsenal”da icarə əsasında çıxış edən, müqavilə ilə isə “Çelsi”yə məxsus olan Sterlinq üçün ilkin marağını bildirib.

Texnikası və sürəti ilə seçilən futbolçunun “Çelsi” ilə müqaviləsi 2027-ci ilə qədər qüvvədədir. İki klub arasında aparılan ilk danışıqlarda tərəflər arasında müsbət siqnallar qeydə alınıb.

Bu mövsüm ümumilikdə 28 oyunda iştirak edən İngiltərə millisinin üzvü 1 qol vurub, 4 məhsuldar ötürmə ilə yadda qalıb.