“Turan Tovuz”un panamalı müdafiəçisi Roderik Miller DÇ-2026 öncəsi Panama millisindən aldığı dəvətlə bağlı fikirlərini bölüşüb.
90plus.az xəbər verir ki, təcrübəli futbolçu klubun mətbuat xidmətinə açıqlamasında mundial heyətində yer almağın onun üçün xüsusi məna daşıdığını bildirib. Miller bu uğuru həm şəxsi inkişafının, həm də uzun illərin əməyinin nəticəsi kimi qiymətləndirib.
Panamalı müdafiəçi “Turan Tovuz”da keçirdiyi dövrün onun karyerasına ciddi təsir etdiyini vurğulayıb:
“Dünya çempionatında iştirak etmək hər bir futbolçunun arzusudur. Bu xəbəri eşidəndə böyük sevinc hissi keçirdim. Mənə inanan və daim dəstək olan hər kəsə təşəkkür edirəm. “Turan Tovuz”a gəldiyim gündən burada özümü ailənin bir üzvü kimi hiss etmişəm”.
Miller qeyd edib ki, Azərbaycan klubunda qazandığı təcrübə onun milli komandadakı çıxışına da müsbət təsir göstərib:
“Burada həm futbolçu, həm də insan kimi inkişaf etdim. Məşqçilər heyəti və komanda yoldaşlarım mənə çox kömək oldular. Azarkeşlərin sevgisini hər zaman hiss etmişəm. Dünya çempionatında həm Panama, həm də “Turan Tovuz” üçün layiqincə mübarizə aparmağa çalışacağam”.
Qeyd: Roderik Miller DÇ-2026 üçün Panama millisinin yekun heyətinə daxil edilib.
