Türkiyə futbolunun simvolik qapıçılarından biri sayılan Fernando Muslera 14 il sonra “Qalatasaray”dan ayrılmışdı.
90plus.az xəbər verir ki, təcrübəli qolkiper üçün keçirilən vida mərasimində klub prezidenti Dursun Özbek onunla gələcəkdə də əməkdaşlıqlar qurulacağını açıqlamışdı. Artıq bu əməkdaşlıq rəsmi şəkildə təsdiqlənib.
“Qalatasaray” klubundan verilən açıqlamaya görə, Musleranın sahibi olduğu “Sportivo Bella Italia (Litoral SAD)” klubu ilə əməkdaşlıq protokolu imzalanıb.
Cənubi Amerikada yeni şəbəkə qurulur
Klubdan yayımlanan rəsmi açıqlamada deyilir:
“Əziz kapitanımız, əfsanəmiz Fernando Musleranın sahibi olduğu ‘Sportivo Bella Italia (Litoral SAD)’ klubu ilə imzalanan protokol çərçivəsində klubumuz, Cənubi Amerika bölgəsindəki klublar və futbol akademiyaları ilə güclü bir şəbəkə qurmaq, istedadlı oyunçuların kəşfi və inkişaf etdirilməsi sahəsində strateji əməkdaşlıqlar həyata keçirəcək.”
Bu yeni əməkdaşlıq “Qalatasaray” üçün həm futbolçu transferləri baxımından, həm də akademik səviyyədə Cənubi Amerika bazarında daha aktiv olmağa imkan verəcək.
