Allan Sen-Maksimin "Fənərbağça"dan ayrıldığını açıqladı: “Çətin, amma gözəl bir təcrübə oldu”
90plus.az xəbər verir ki, Türkiyə klubundan ayrılan Sen-Maksimin şəxsi sosial media hesabında etdiyi paylaşımda klubdakı təcrübəsini “çətin, amma gözəl” olaraq qiymətləndirib. Futbol xaricində bəzi çətinliklər yaşadığını qeyd edən fransız futbolçu, “Şükür ki, indi hər şey qaydasındadır” ifadəsini istifadə edib.
"Fənərbağça"dan ayrılmasının ardından fransız vinger “Çox təşəkkür edirəm. Bütün mesajlarınızı oxudum, sadəcə təşəkkür edirəm uşaqlar. Dəstəyinizi heç vaxt unutmayacağam. Ona görə bir şeyi bilin, bunlar sadəcə sözlər deyil! Mən də sizi sevirəm” mesajını paylaşıb.
Allan "Fənər"dən əvvəl Səudiyyə Ərəbistanının "Al Ahli" klubunda oynayıb və oradan icarə ilə Türkiyə klubuna qoşulmuşdu."Fənərbağça"da 24 oyuna 3 qol və 4 asistlə yadda qalıb.
Transferin son anda baş tutmaması ilə bağlı, Sen-Maksimin “Bir yalan dünyanın yarısını dolaşarkən, həqiqət hələ ayaqqabılarını geyinir” deyə qeyd edib. Bundan əlavə, şəxsi həyatında yaşadığı çətinliklərə də toxunaraq, “Bunları yaxın zamanda sizə izah edəcəyəm” ifadəsini istifadə edib.
O, gələcəyi ilə bağlı hələlik rəsmi bir açıqlama verməyib.
