Türkiyə millisinin oyunçusu Hakan Çalhanoğlu mövsümün sonunda "İnter"dən ayrılacağı ilə bağlı deyilənləri təkzib edib. 90plus.az xəbər verir ki, bu barədə "La Gazzetta dello Sport"a danışan futbolçu “mavi-qara" formanı geyinməkdən qürur duyduğunu və xoşbəxt olduğunu bildirib: "Bircə arzum var, o da "İnter"də qalmaqdır. Çünki bu, xüsusi klubdur və bu klubun bir parçası olmaqdan qürur duyuram". Xatırladaq ki, Hakan Çalhanoğlunun "Lids Yunayted" və ya "Sauthempton"a gedəcəyi ilə bağlı iddialar yayılıb. Qeyd edək ki, 2017-ci ildə "Bayer"dən 23 milyon avroya "Milan"a transfer olunan türkiyəli futbolçu ötən mövsüm "İnter"ə azad agent kimi keçib. Hakan Çalhanoğlu bu il "İnter"də 32 matçda 3 qol vurub, 6 məhsuldar ötürmə edib.