“Santos” matçında inanılmaz səhv – Neymar ehtiyat oyunçular skamyasında qaldı.

90plus.az xəbər verir ki, Braziliyada "Santos" – "Koritiba" (0:3) qarşılaşmasında olduqca qəribə hadisə yaşanıb.

Matç zamanı “Santos”un məşqçilər korpusu əvəzlənməsi planlaşdırılan futbolçu kimi 31 nömrəli Qonzalo Eskobarın adını təqdim edib. Lakin texniki heyətin səhvi səbəbindən tabloya 10 nömrəli Neymarın əvəzləndiyi yazılıb.

Həmin anda Neymar meydandan kənarda tibbi yardım alırdı. Braziliyalı ulduz daha sonra yenidən meydana qayıtmağa çalışsa da, referi buna icazə verməyib. Çünki rəsmi olaraq artıq əvəzlənmiş futbolçu hesab olunurdu.

Nəticədə Neymar hakim icazəsi olmadan meydana daxil olduğu üçün sarı vərəqə ilə cəzalandırılıb. Təcrübəli futbolçu baş verən anlaşılmazlığı yayım kamerasına göstərərək etiraz edib.

Buna baxmayaraq, qərar dəyişdirilməyib və Neymar görüşün qalan hissəsini ehtiyat oyunçular skamyasında izləməli olub.